Урушнинг Зеленский имиджига таъсири

 

Россиянинг Украинага ҳужуми давомида Владимир Зеленский бутун дунёни лол қолдириб келмоқда.

 

Зеленский жаҳон рекордини ҳам ўрнатди: ҳеч бир президент фуқароларга ҳар куни мурожаат қилмаган. Владимир Зеленский бу билан қарийб 1 йил давомида шуғулланиб келади.

 

Украина президентининг видеомурожаатлари уруш хроникасига айланиб қолди. Улар мамлакат билан бир қаторда унинг президенти ҳам ўзгариб борганини кўрсатади.

 

Биринчи видео ҳужумга бир неча соат қолганда,  2022 йил 23 февралида ёзилган. Унда Зеленский ўз фуқароларидан ташқари россияликларга ҳам мурожаат қилиб, уларни норозиликка чақирган ва огоҳлантирган.

 

“Агар бизга ҳужум қилинса, агар бизнинг ҳаётимизни, озодлигимизни, болаларимиз ҳаётини тортиб олишга уринишса, биз ҳимояланамиз. Ҳужум эмас, ҳимоя қиламиз”, — деган у.

 

Бу Зеленскийнинг охирги марта соқоли олинган, костюм ва галстук билан ёзилган видеоси эди.

 

24 февралдан бери Влаlимир Зеленский ва Украина ҳукумати Киевда қолиб келмоқда, ҳатто Россия қўшинлари Киев атрофида бўлган пайтда ҳам улар ҳеч қаерга кетмади. Бу кўпчиликни, жумладан, РФ президенти Владимир Путинни ҳайратга солди. У Зеленский Украинанинг ғарбий ҳудудлари ёки чет элга кетиб қолишини кутганди. Бундай таклифлар ҳам янграган эди. Аммо Зеленский “менга такси эмас, қуроллар керак” деб жавоб берган. Айнан шу сўзлар чегара ортидан хайрихоҳлик ва фуқароларнинг жасоратини кўтарди.

 

Ҳужум бошланишидан олдин ғарб махсус хизматлари ва давлат раҳбарлари РФ ҳужумга тайёрланаётганини айтиб огоҳлантирганда ва элчихоналарини эвакуация қилганда Зеленский бу хабарларни танқид қилди. Кейинчалик у ваҳиманинг олдини олиш учун шундай қилганини айтган.

 

“Махсус операция”нинг биринчи кунида Зеленский тўқ яшил рангли курткада видео ёзган, шундан бери ҳарбий дресс-код унинг стилига айланган. Бутун дунё уни ҳарбий кийим ва 3 кунлик соқоли билан эслаб қолди, у расмий учрашувлар, газета-журналларнинг муқовасидаги расмлар, интервьюларга ҳам шу образига содиқ қолган ҳолда боради.

 

Ҳарбий даврда Украина президенти бўлгач, у энг яхши амаллайдиган иши — коммуникацияни танлади.

 

Камера унинг энг кучли қуролига айланди. У ҳар куни қисқа видеоларда пайдо бўлиб, фуқароларни руҳлантиради, тўғри сўзлар топиб гапиради.

 

Бундан ташқари, Зеленский тез-тез фронтга бориб, ҳарбийлар билан учрашади. У саҳналаштиришдан фойдаланмайди, балки урушдан реал тасвирлар олади.

 

Россия ҳаракатларидан олдин Зеленскийнинг рейтинги тушиб кетганди, аммо ўтган бир йилда кескин ошиб, 80-90 фоизга етди.

 

Нега рақиблари Зеленскийга жиддий қарамаган?

 

Владимир Зеленский худди “Халқ хизматчиси” (Слуга народа) фильмидагидек сиёсий тажрибасиз Украина президенти бўлди. Президентликка номзоди қўйилишидан олдин Зеленский машҳур қизиқчи эди. Ўша даврда Россия президенти бўлган Дмитрий Медведевнинг Украинага ташрифи чоғида у саҳанада чиқиш қилган.

 

РФ раҳбарияти Зеленскийга жиддий қарамаганининг эҳтимолий сабаби ҳам шу.

 

У Россия билан яхши алоқада бўлиб, у ерда даромад топарди, Қрим аннекциясидан кейин ҳам Владимир рус тилида чиқишларини давом эттирган. Айрим украиналиклар уни бу учун кечира олмаган.

 

Аммо Россия ҳужуми ҳаммасини ўзгартирди.