Туркияда 600 дан ортиқ одам зилзила натижасида қулаган бино сабаб тергов остида
Нурдаги шаҳри мери ҳам ҳибсга олинган.
Туркия кучли зилзиладан кейин турли шаҳарларда қулаган бинолар билан у ёки бу тарзда алоқадор бўлган 600 дан ортиқ одамни тергов қилмоқда.
Уларнинг 182 нафари судгача ҳибсга олинган. Булар қурилиш пудратчилари, биноларнинг эгалари ёки менежерлари ҳисобланади.
Шунингдек, Газиантеп вилоятининг Нурдаги шаҳри ҳокими Оккеш Кавак ҳам хавфсизлик кучлари томонидан ҳибсга олинган. У билан бирга уйларнинг қурилишида иштирок этган ширкат эгаси ҳам ушланган.
Адлия вазири Бекир Бўздағнинг сўзларига кўра, ҳозирда текширувлар давом этмоқда ва айрим ҳолларда бино қулаган жойларда янги далилларнинг топилиши жиноий тергов учун асос бўлиб хизмат қилмоқда.
Мутахассисларнинг фикрича, зилзиладан сўнг қулаган кўплаб бино ва иншоотларда сифатсиз қурилиш материалларидан фойдаланилган ва давлат стандартларига жавоб бермаган ҳолда қурилган.
