Фарғонада ИИБ ходимини ҳақорат қилган аёлга чора кўрилди
У профилактика инспекторининг қонуний талабларига бўйсунмаган.
Ижтимоий тармоқда Фарғона шаҳрида аёл кишининг ИИО ходимини ҳақорат қилаётгани акс этган видеохабар тарқалди. Ҳолат юзасидан вилоят ИИБ расмий муносабат билдирди.
Маълум бўлишича, жорий йилнинг 10 март куни Фарғона шаҳар ИИО ФМБ навбатчилик қисмига шаҳарнинг Янги аср кўчасида яшовчи С.О (аёл) мурожаат қилиб, қўшниси Д.К (видеохабардаги сўкинаётган аёл) уни турли сўзлар билан ҳақорат қилаётганлиги сабабли яшаш хонадонига ИИБ ходими келишини сўраган.
Мурожаат бўйича профилактика инспектори Ё.М. айтилган манзилга бориб, Д.К.ни тинчлантирмоқчи бўлган. Аёл эса профилактика инспекторининг қонуний талабларига бўйсунмай, унинг шаъни ва қадр қимматини камситувчи сўзлар билан ҳақорат қилган.
Мазкур ҳолат юзасидан шу куннинг ўзида Д.К.га нисбатан тегишли тартибда ҳужжатлар расмийлаштирилиб, прокуратура органларига юбориш чоралари кўрилган.
