Самарқандда ўқитувчи 6-синф ўқувчисига тегажоғлик қилгани айтилди
Шундан сўнг қизнинг отаси ва ўқитувчи ўртасида жанжал юз берган.
Ижтимоий тармоқда Самарқанд вилоятининг Каттақўрғон туманида мактаб ўқитувчиси ўқувчига тегажоқлик қилгани ва қиз уксус ичиб, касалхонада ётгани ҳақида хабарлар тарқалди. Ҳолатга туман ИИБ расмий изоҳ берди.
Маълум бўлишича, жорий йил 10 февраль куни Каттақўрғон туманидаги мактабда синф раҳбари сифатида ишлаб келаётган ўқитувчи вояга етмаган 6-синф ўқувчиси 4 кун дарс қолдиргани сабабли ундан отасини чақиришини сўраган.
Бироздан сўнг мактабга ўқувчининг онаси келган. У билан мактаб маъмурияти гаплашиб, қизининг мунтазам равишда дарс қолдирётганини тушунтириб, тушунтириш хати ёзиб беришини сўраган. Аёл “ҳеч нарса ёзиб бермайман” деб мактабдан чиқиб кетган ва турмуш ўртоғига қизига ўқитувчиси тегажоғлик қилганини айтган. Шундан кейин қизнинг отаси мактабга келиб, синфхонада гуруҳ раҳбарига бақириб уни қўпол сўзлар билан ҳақорат қилган ва ёқасидан тортиб жанжал кўтарган.
Қизнинг онаси ҳамда ўқувчи қизнинг тушунтириш хатида ўқитувчининг тегажоғлик қилгани тўғрисидаги важлари ўз тасдиғини топмаган.
Қизнинг отасининг хатти-ҳаракатида Маъмурий жавобгарлик тўғрисидаги кодекснинг 183-моддаси (майда безорилик), онасиникида эса 40-моддасида (туҳмат) назарда тутилган ҳуқуқбузарлик аломатлари борлиги сабабли тўпланган ҳужжатлар қонуний қарор қабул қилиш учун ЖИБ Каттақўрғон туман судига юборилган. Суд органи томонидан ўқувчининг ота-онасига нисбатан жарима жазоси қўлланган.
