Паркентда кучли ёғингарчилик сабаб 47 киши адирда қолиб кетди
ФВБ уларни қутқариш учун 7 та махсус техника юборган.
Кеча, 20 март куни Тошкент вилоятининг Паркент туманида салкам 50 киши дам олиш учун адирга чиқиб, кучли ёғингарчилик сабаб пастга тушолмай қолиб кетди. Ҳолат юзасидан Фавқулодда вазиятлар вазирлиги маълумот берди.
Қайд этилишича, Паркент тумани Қизилтоғ шаҳарчаси атрофидаги адирликларга ўз автомобилларида дам олиш мақсадида борган фуқаролар кучли ёмғир ёғиши натижасида адирликларда қолиб кетган ва пастга тушолмай қолган.
Қутқарувчилар 7 та махсус техника билан айтилган манзилга етиб бориб, қидирув-қутқарув ишларини олиб борган. Шундан сўнг дам олувчиларнинг 13 та енгил турдаги автоуловлари ҳамда 47 нафар фуқаро хавфсиз жойга олиб тушилган.
Юзага келган вазият оқибатида ҳалок бўлган ва тан жароҳат олган фуқаролар йўқ.
