Самарқандда олтин қазиб олишга шароит яратиб берувчи шахс ушланди
У бунинг эвазига фуқародан пора олаётганда қўлга тушган.
Самарқанд вилоятининг Пахтачи туманида олтин қазиб олиш учун шароит яратиб беришни ваъда қилган фирибгар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Қайд этилишича, департаментнинг Пахтачи туман бўлими томонидан ДХХ ходимлари билан ҳамкорликда тезкор тадбир ўтказилган. Унда фуқаро С.Ҳ. бошқа бир фуқаро Ф.Д.Нинг ишончига кириб, унга танишлари ёрдамида “Қорақўтон” тоғида олтин қазиб олиши учун шароит яратиб бериши эвазига 1 300 АҚШ долларини олган вақтида ашёвий далиллар билан қўлга тушган.
Мазкур ҳолатлар юзасидан Жиноят Кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари олиб борилмоқда.
