Зангиотада “оздирувчи дори” сифатида сотилаётган психотроп воситалар аниқланди
Таркибида кучли таъсир этувчи моддалар бўлган мазкур дорилар қозоғистонлик фуқаро томонидан етказиб берилган.
Тошкент вилоятининг Зангиота туманида 20 хилга яқин турли ном ва кўринишдаги жами 108 минг 696 дона таркибида кучли таъсир қилувчи модда ёки уларнинг аналоглари бўлган дориларнинг муомалага киритилишининг олди олинди. Бу ҳақда вилоят ИИББ ахборот хизмати хабар берди.
Маълум қилинишича, 1989 йилда туғилган фуқаро Г.Д.нинг яшаш хонадони холислар иштирокида кўздан кечирилган. Натижада уй ичи ва ҳовлидаги автомашинада қора бозордаги нархи 200 млн сўмга тенг бўлган 15 хил ном ва кўринишдаги 36 минг 696 дона кучли таъсир қилувчи дори воситалари сотиш мақсадида сақлаб келинаётгани аниқланиб, дорилар далилий ашё сифатида олинди.
Шундан сўнг тезкор тадбир давом эттирилиб, бу аёлга дори воситаларини етказиб бераётган таъминотчи ҳам Ўзбекистон ҳудудига «товар» билан кирган вақтида ИИББ ходимлари томонидан қўлга олинди.
Аниқланишича, 1989 йилда туғилган Э.Ў. (Қозоғистон Республикаси фуқароси) 2 минг қути ёки 72 минг дона таркибида кучли таъсир қилувчи модда бўлган дориларни яширин равишда давлат чегарасидан олиб ўтган.
Ҳозирда мазкур ҳолат юзасидан Жиноят кодексининг 251-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) 3-қисми билан жиноят иши қўзғатилиб, тергов ҳаракатлари ўтказилмоқда.
