Апрелда Тошкентда халқаро форум ўтказилади
Унда Ўзбекистон ва Марказий Осиёнинг инвестициявий салоҳиятини атрофлича очиб беришга қаратилган ялпи мажлис бўлиб ўтади.
Жорий йилнинг 27-28 апрель кунлари Congress Hall Tashkent City'да 2-Тошкент халқаро инвестиция форуми бўлиб ўтади. Бу ҳақда Ташқи ишлар вазирлиги хабар бермоқда.
Эслатиб ўтамиз, биринчи ТИИФ дунёнинг 56 мамлакатидан 2000 дан ортиқ иштирокчилар — йирик инвесторлар ва юқори мартабали меҳмонларни бирлаштирган йирик халқаро тадбирга айланганди.
ТИИФ-2023 қатнашчиларининг сони янада ошиши кутилмоқда, унинг давомида Ўзбекистон ва Марказий Осиёнинг инвестициявий салоҳиятини атрофлича очиб беришга қаратилган ялпи мажлис, экспертларнинг 30 дан ортиқ қизғин баҳс-мунозаралари, панель мунозаралари, давра суҳбатлари ва б2б музокаралари ўтказилиши режалаштирилган.
Тадбирда иштирок этиш учун www.iift.uz сайтида 2023 йил 20 апрелгача онлайн рўйхатдан ўтиш мумкин.
