Тошкент вилоятида салкам 50 туп кўчат ўтин қилиш мақсадида кесиб ташланди
Улар ўрмон хўжалиги ҳудудида бўлган.
Ижтимоий тармоқларда Тошкент вилоятининг Саксонота ўрмон хўжалиги Чотқол ўрмон бўлимига қарашли 4 гектар майдонда хандон писта кўчатлари кесиб ташланаётгани ҳақида хабар тарқалди. Ҳолат юзасидан Табиат ресурслари вазирлигининг вилоят бошқармаси расмий муносабат билдирди.
Маълум бўлишича, 1987 йилда туғилган Чирчиқ шаҳрида истиқомат қилувчи фуқаро С.А. 48 туп турли ўлчамдаги хандон писта дарахтларини ўтин қилиш мақсадида кесиб ташлаган.
“Ҳолат юзасидан далолатнома расмийлаштирилиб, ҳуқуқбузарга нисбатан Маъмурий жавобгарлик тўғрисидаги кодекснинг 79-моддаси 1-қисмига асосан жарима ҳамда табиатга келтирилган зарар ҳисоб-китоб қилиниб, ундириш ишлари амалга оширилмоқда”, — дейилади хабарда.
