Озодбек Назарбеков МЧЖ таъсисчиси экани аниқланди

 

Ижтимоий тармоқларда кенг муҳокамаларга сабаб бўлган Маданият ва туризм вазири Озодбек Назарбековнинг «Коба санъат мажмуаси» МЧЖ таъсисчи экани тасдиқланди. Бу ҳақда Коррупцияга қарши курашиш агентлиги маълум қилди.

 

Унга кўра, ўрганиш мобайнида ҳақиқатан ҳам Озодбек Назарбековнинг 2016 йил 16 мартда давлат рўйхатидан ўтказилган «Коба санъат мажмуаси» МЧЖда 100 фоизлик улуш билан таъсисчи эканлиги аниқланди.

 

Агентликнинг қайд этишича, Вазирлар Маҳкамасининг 1992 йил 6 мартдаги «Тадбиркорлик фаолияти билан шуғулланиш тақиқланган мансабдор шахсларнинг рўйхати тўғрисида»ги қарорига асосан давлат ҳокимияти ва бошқарув органларининг, ҳуқуқни муҳофаза қилиш органларининг ходимларига тадбиркорлик фаолияти билан шуғулланиши тақиқланган. 

 

Шунингдек, «Тадбиркорлик фаолияти эркинлигининг кафолатлари тўғрисида»ги қонуннинг 4-моддасига асосан давлат органлари (қонун ҳужжатларида назарда тутилган ҳоллар бундан мустасно), уларнинг мансабдор шахслари, шунингдек, тадбиркорлик фаолияти билан шуғулланиши қонунчиликда ман этилган бошқа шахслар тадбиркорлик фаолияти субъектлари бўлиши мумкин эмас. 

Шу билан бирга, «Давлат фуқаролик хизмати тўғрисида»ги қонунга кўра, давлат фуқаролик хизматчиси тадбиркорлик фаолияти субъектларини ташкил этишга, уларнинг муассиси (иштирокчиси) бўлишга, тадбиркорлик фаолияти субъектида ташкилий-бошқарув, маъмурий-хўжалик вазифаларини бажаришга ҳақли эмас.

 

Бугунги кунда қонунчилик ҳужжатларига риоя қилган ҳолда юқоридаги ҳолатлар бартараф этилиб, «Коба санъат мажмуаси» МЧЖ таъсисчиси ўзгартирилган. Бундан ташқари, 30 май куни Маданият ва туризм вазирлигига келгусида «Давлат фуқаролик хизмати тўғрисида»ги қонун ва бошқа қонуности ҳужжатларига қатъий риоя қилинишини ҳамда вазирлик фаолиятида очиқлик ва шаффофлик, рақобат ва холислик ҳамда коррупцияга йўл қўймаслик принципларига риоя қилинишини таъминлаш чораларини кўриш юзасидан тақдимнома киритилган.