Зўравонликка учраган аёлларни қўллаб-қувватлаш учун call-марказлар ташкил этилади
Шунингдек, барча ҳудудларда аҳолига ижтимоий кўмак кўрсатувчи «Инсон» марказлари ишга туширилади
Шавкат Мирзиёев иштирокида бўлиб ўтаётган ИИВ кенгайтирилган ҳайъат йиғилишида аёллар жиноятчилигининг 40 фоизга яқини ишламайдиган ёки доимий банд бўлмаган хотин-қизлар томонидан содир этилгани таъкидланди. Бундан ташқари, жиноятдан 2,7 мингга яқин, оилавий зўравонликдан 20 мингга яқин аёллар жабр кўрган.
Шунингдек, давлат раҳбари яқинда Фарғонада 11 ёшли қизчанинг мурдаси зўрлаш ва қотиллик аломатлари билан топилганини тилга олиб, бу ҳолат вазият қанчалик оғирлигини кўрсатиб турганлигини айтди.
Президент янги тузилган Ижтимоий ҳимоя миллий агентлиги доирасида ҳар бир туманда:
- ижтимоий хизматларни «ягона дарча» тамойили асосида кўрсатадиган ижтимоий хизматлар марказлари;
- психолог, ҳуқуқшунос, ижтимоий ходимдан иборат «мобил гуруҳлар»;
- зўравонликка учраган аёлларни ижтимоий қўллаб-қувватлаш бўйича call-марказлар ташкил қилишни топширди.
Шунингдек, қийин аҳволга тушиб қолган хотин-қизлар учун ҳуқуқий ва психологик ёрдам кўрсатиш хизматини кенгайтириш вазифаси қўйилди.
Қайд этилишича, агентлик вилоят ҳокимлари билан бирга йил якунига қадар барча ҳудудларда аҳолига ижтимоий кўмак кўрсатувчи «Инсон» марказларини ишга туширади.
