«Перевод» имтиҳонида иштирок этганларнинг қарийб 90 фоизи белгиланган талабни бажара олмади
Ҳудудга киришда тартиб-қоидани бузгани учун жараёндан четлатилган талабгорлар сони ОТМларга кириш тест синовларига нисбатан 25 баравар кўп.
Ўқишни кўчириш бўйича тест синовида иштирок этган талабгорларнинг 89,2 фоизи талабни бажара олмаган.
Билим ва малакаларни баҳолаш агентлиги маълумотларига кўра, талабалар ўқишини хорижий ва нодавлат ОТМлардан давлат ОТМларига кўчириш бўйича ўтказилган имтиҳонларда жами 41 122 нафар талабгор иштирок этди.
Бунда алоҳида иқтидор талаб этиладиган таълим йўналишлари бўйича касбий (ижодий) имтиҳонлар ОТМлар томонидан, тест синовлари эса Билимни баҳолаш агентлиги томонидан ўтказилди.
Қайд этилишича, тест синовида иштирок этган 41 122 нафар талабгорнинг 4 433 нафари (10,8 фоиз) талабни бажарган бўлса, 36 689 нафари (89,2 фоиз) талабни бажара олмаган.
Ўқишни кўчириш бўйича тест синовларида 41 122 нафар талабгордан 75 нафари тест синови жараёнида тартиб-қоидани бузгани учун тест синовидан четлатилган. Шунингдек, ҳудудга киришда эса 78 нафар талабгор тартиб-қоидани бузгани учун жараёндан четлатилган.
