Бухорода 125 туп дарахт кесиб ташланди
Бу билан табиатга 1,7 миллиарддан ортиқ зарар етказилган.
Мамлакатимизда "Яшил макон" умуммиллий лойиҳаси доирасида йилига 200 миллион туп дарахт ва бута кўчатларини экиш ва бу орқали республикамизда яшил майдонларни кўпайтириш борасида кенг кўламли ишлар амалга оширилмоқда.
Афсуски, дарахт ва буталарни ноқонуний кесиш ҳолатлари жуда тез-тез учрамоқда. Пешку туманининг “Мустақиллик”, “Чиғирчи”, “Янгибозор”, “Садир” ва “Малишояк” маҳаллалари ҳудудидан оқиб ўтувчи “Зандани” каналининг муҳофаза зонасида ўсиб турган жами 125 туп дарахт, шундан 23 туп кам қимматли, 102 туп қимматбаҳо дарахтлар кесилган.
Дастлабки хулосага кўра, ҳудудда дарахтлар кесилиши оқибатида табиатга 1,7 млрд. сўмдан ортиқ жуда кўп миқдордаги зарар етказилган.
Аниқланган қонун бузилиши ҳолатлари юзасидан Бухоро вилояти прокуратураси томонидан жиноят иши қўзғатилиб, дастлабки тергов ҳаракатлари ўтказиш учун ички ишлар органларига юборилди.
Мазкур жиноят иши тергови устидан прокурор назорат ўрнатилган.
