Анталия аэропортида Россияга тегишли самолёт ёниб кетди

Россиянинг "Азимут" авиакомпаниясининг Сочидан учган Sukhoi Superjet 100 самолёти Туркиянинг Анталия шаҳри аэропортига қўнганидан сўнг ёниб кетди. 24 ноябрь, якшанба куни содир бўлган воқеани Росавиация матбуот котиби Артем Кореняко ўзининг Telegramʼдаги каналида тасдиқлади.

 

У Россиянинг Анталиядаги бош консуллигига таянган ҳолда аниқлик киритишича, ҳодиса оқибатида самолёт йўловчиларидан ҳеч бири жабрланмаганини айтди. Авиакомпания ҳам қурбонлар йўқлигини тасдиқлади. Самолёт командири йўловчиларни махсус траплар ёрдамида эвакуация қилишга қарор қилган. Унинг қўшимча қилишича, "Азимут" ортга қайтиш учун захира самолёт тайёрламоқда. Туркия Транспорт вазирлиги маълумотларига кўра, самолётда 95 киши бўлган. Анталия аэропорти бортда 91 киши бўлганини маълум қилди.

 

Кореняконинг сўзларига кўра, кемадаги ёнғин Туркия аэропортининг қутқарув гуруҳи томонидан тезда ўчирилган.

 

AirportHaber Туркия авиация портали хабарига кўра, Superjet 100 двигатели ёниб кетган. Mash Telegram-каналининг ёзишича, самолёт қўниш вақтида чап қаноти билан учиш-қўниш йўлагига урилган бўлиши мумкин.

 

Авиакомпания маълумотларига кўра, Superjet кучли ёмғир ва шамол туфайли ноқулай об-ҳаво шароитида қаттиқ қўнганидан сўнг ёниб кетган.