Олимлар Трампга қарши норозилик намойиши ўтказди
Улар қаттиқ иқтисодий тежамкорлик сиёсатига қарши.
Жума куни АҚШнинг Нью-Йорк, Сан-Франциско ва бошқа шаҳарларида минглаб олимлар илмий тадқиқотлар учун ажратиладиган маблағларнинг камайтирилиши, иш ўринларининг қисқартирилиши ва қаттиқ иқтисодий тежамкорлик сиёсатига қарши норозилик намойишларида иштирок этишди. Париж ва бошқа Европа шахарларида ҳам америкалик олимларни қўллаб-қувватловчи акциялар ўтказилди.
Намойишчиларнинг қўлларидаги плакатларда “Илм-фанга қўллаб-қувватлов”, “Трамп ва Маск - навбатдаги экологик фалокат”, “Илм-фан таҳдид остида” каби шиорлар акс этди. Сўнгги ойларда Илон Маск ва унинг Ҳукумат бошқаруви самарадорлиги департаменти (DOGE) тежамкорлик сиёсати доирасида бюджет соҳасида кенг кўламли қисқартиришларни амалга оширмоқда. Бундан ташқари Трамп тарафдорларининг айримлари тиббиёт ва вакциналарга оид илмий фактларга шубҳа билан қарашмоқда.
АҚШ ҳукумати, шунингдек, Нью-Йоркдаги Колумбия университети учун ажратилган 370 миллион долларлик молиялаштиришни бекор қилди. Ҳукумат университет раҳбариятини ўтган йили олийгоҳ кампуси ҳудудида ўтказилган Фаластинни қўллаб-қувватлаш намойишлари вақтида яҳудий талабаларни таъқиб ва таҳдидлардан етарлича ҳимоя қилмаганликда айблади.
