Наманганда 16 ёшли қиз бошқарган Spark каналга тушиб кетди
Ҳодиса оқибатида қизнинг онаси ва синглиси вафот этган.
Наманган вилоятининг Учқўрғон туманида юз берган аянчли йўл-транспорт ҳодисаси икки нафар инсон ҳаётига зомин бўлди. Воқеа Spark русумли автомобиль иштирокида содир бўлган. Энг ачинарлиси, рулда ҳали ҳайдовчилик гувоҳномасига эга бўлмаган 16 ёшли қиз бўлган.
Расмий маълумотларга кўра, автомобиль қизнинг отасига тегишли бўлиб, у бошқарувни қизига топширган. Машина олд ўриндиғида отаси, орқа ўриндиқда эса унинг онаси ва 10 ёшли синглиси бўлган.
Қиз хавфли бурилишда бошқарувни йўқотган ва автомобиль йўл четидаги Андижон каналига тушиб кетган. Ҳодиса оқибатида орқа ўриндиқда бўлган аёл ва кичик ёшли қизалоқ нафас йўлига сув тиқилиши сабабли ҳаётдан кўз юмган.
Машинани бошқарган вояга етмаган қиз ва унинг отаси турли тан жароҳатлари билан касалхонага ётқизилган.
Мазкур ҳолат юзасидан терговга қадар текширув ишлари олиб борилмоқда.
