НАТОнинг ҳаракатлари глобал урушга сабаб бўлади
НАТО тинчликпарвар кучлари Украинага киритилса, бу учинчи жаҳон урушига олиб келиши мумкин.
Россиянинг собиқ мудофаа вазири, ҳозирда Хавфсизлик кенгаши котиби вазифасини бажараётган Сергей Шойгу, Европа давлатлари томонидан Украинага тинчликпарвар кучлар киритилиши мумкинлиги ҳақидаги фикрларга кескин муносабат билдирди.
Унинг сўзларига кўра, агар НАТОга аъзо мамлакатлар ўз ҳарбийларини Украина ҳудудига жойлаштирса, бу бевосита НАТО билан Россия ўртасида ҳарбий тўқнашув хавфини туғдиради ва охир-оқибат учинчи жаҳон уруши бошланиши мумкин.
“Европадаги оқил сиёсатчилар бу сценарийнинг оқибатларини англаб етишмоқда”, — деди Шойгу. У шунингдек, Украинани "бизнинг тарихий ҳудудимиз" деб атади.
Эслатиб ўтамиз, оммавий ахборот воситаларида тарқалган Трампнинг “тинчлик режаси”га кўра, уруш тугатилгач, Украина ҳудудига Европа Иттифоқи давлатларининг тинчликпарвар кучлари жойлаштирилиши мумкин, бироқ бу ҳарбийларга АҚШ томонидан хавфсизлик кафолатлари берилмайди. Ана шу сабабли, Буюк Британия ва Франция ушбу режага нисбатан эҳтиёткорлик билан ёндашмоқда ҳамда ўз қўшинларини юборишни истамаяпти.
