Хитой саноатда глобал етакчиликни мустаҳкамлади
Ишлаб чиқаришда Хитойнинг улуши кескин ошди.
БМТнинг Статистика бўлими маълумотларига кўра, 2023 йилда бутун дунё бўйича саноат ишлаб чиқаришининг 29 фоизи Хитой ҳиссасига тўғри келган. Бу кўрсаткич билан Хитой нафақат глобал саноат гиганти сифатида тан олинган, балки иккинчи ўриндаги АҚШни қарийб 12 фоизга ортда қолдирган. Маълумот учун, АҚШ 2010 йилгача саноат соҳасида етакчи бўлиб келган, аммо айнан ўша йилдан бошлаб бу ўринни Хитойга бой берган.
2023 йилда Хитойда саноат сектори орқали яратилган қўшилган қиймат 4,8 триллион долларга етган ва бу мамлакат ЯИМининг 27 фоизини ташкил этган. АҚШда эса бу кўрсаткич анча паст — бор-йўғи 10 фоиздан бироз кўпроқ. Яъни, бугунги кунда АҚШ иқтисодиёти саноатга энг кам боғлиқ бўлган етакчи давлатлардан бири ҳисобланади. Бу борада унга фақат Франция яқинроқ.
Хитойдан ташқари, Ирландия, Камбоджа, Жанубий Корея, Ветнам ва Таиланд каби мамлакатларда ҳам саноат иқтисодиётда 25 фоиз ёки ундан кўпроқ улушга эга. Бироқ саноат ҳажми жиҳатидан бу давлатлар ҳеч қайси томондан Хитойга тенглаша олмайди.
