АҚШ 18 давлат билан савдо келишувларига интилмоқда
Канада, Мексика ва Хитой АҚШнинг савдо рўйхатидан чиқарилди.
АҚШ президенти Доналд Трамп маъмурияти 18 та йирик ҳамкор давлат билан савдо музокараларини олиб бориш учун ягона асос ишлаб чиқди.
Янги ёндашувдан кўзланган мақсад — 8 июлга қадар импорт бўйича ўзаро божхона тўловлари масаласида музокараларни соддалаштириш ва келишувларга эришиш. АҚШ савдо вакили идораси томонидан тайёрланган режа тарифлар ва квоталар, тарифсиз савдо чекловлари, рақамли савдо, товарларнинг келиб чиқиш қоидалари ва иқтисодий хавфсизлик каби соҳаларни қамраб олади.
Музокаралар келаси икки ой давомида босқичма-босқич (ҳар ҳафтада олтита давлат билан) ўтказилиши режалаштирилган.
Бироқ, Канада, Мексика ва Хитой ушбу 18 давлат қаторига киритилмагани таъкидланди. Канада ва Мексикадан олиб кириладиган товарларга алоҳида 20 фоизлик бож жорий қилинган, Хитойдан импорт қилинадиган божлар эса Трамп маъмуриятининг сўнгги чораларидан сўнг 145 фоизгача кўтарилган.
Эслатиб ўтамиз, 2 апрель куни АҚШ президенти дунёнинг 185 та давлати ва ҳудуди маҳсулотларига божхона тўловлари жорий этилишини маълум қилган эди. Улар орасида Озарбайжон ҳам бор. Озарбайжон маҳсулотлари учун камида 10 фоизлик божхона тўлови белгиланди. 5 апрелдан универсал тарифлар, 9 апрелдан эса индивидуал тарифлар кучга кирди. Шу билан бирга, Трамп бир қатор давлатларга нисбатан импорт тарифларини 90 кун муддатга кечиктиришга қарор қилган.
