Истанбулда ҳалокатли зилзила хавфи ошмоқда
Сейсмологлар Истанбул учун огоҳлантириш берди.
Истанбул ҳалокатли зилзила билан муқаррар равишда юзма-юз турибди. Бу ҳақда Истанбул муниципалитетининг зилзила масалалари бўйича олимлар кенгаши аъзоси, сейсмология профессори Халук Эйидўғон маълум қилди.
Профессорнинг таъкидлашича, Мармара минтақаси тарихан ҳалокатли зилзилалар содир бўлиб келган ҳудудлардан биридир. Буни Византия империясининг тарихий архивлари ҳам тасдиқлайди.
Эйидўғон сўнгги вақтларда ОАВда тарқалган, “енгил зилзилалар кучли зилзиланинг яқинлашаётганидан далолат беради” деган хабарларни илмий асосга эга эмаслигини билдирди. У: “Минтақанинг сейсмик тарихидан хабардор бўлган ҳар бир киши эртами-кечми Мармара ҳудудида кучли зилзила бўлишини билади. Биз, олимлар, бу хавф ҳақида анчадан бери огоҳлантириб келамиз”- дейди.
Мутахассис, шунингдек, кучли зилзила 40–50 йил ичида содир бўлиши мумкинлиги ҳақидаги тахминларни ҳам нотўғри деб атади. Унинг айтишича, сейсмологлар фақат эҳтимолларни ҳисоблашлари мумкин, аммо аниқ санани айтиш илмий жиҳатдан имконсиз.
“Мармара денгизида кучли зилзила юз бериши хавфи, шубҳасиз, жуда юқори”, — дея хулоса қилди Эйидўғон.
Эслатиб ўтамиз, 23 апрель куни Истанбулда кетма-кет зилзилалар рўй берди. Энг кучлиси 6,2 магнитудада қайд этилган бўлиб, натижада 150 дан ортиқ одам жароҳатланган, битта уч қаватли бино бутунлай қулаган. Зилзиладан кейин камида 50 та ер силкиниши қайд этилган.
