Туркияда эркак операциядан сўнг она тилини унутди

 

Туркиянинг Кония шаҳрида яшовчи 67 ёшли эркак тиззасидаги жарроҳлик амалиёти ва артерия тиқилиб қолганидан кейин ўз она тили — турк тилини унутди ва фақат данияча сўзлаша бошлади.

 

Операциядан сўнг беморнинг ўнг қўли ва оёғида кучсизланиш ҳолати кузатилган. Шифокорлар шошилинч ангиография ўтказиб, томирлардаги тўсиқни олиб ташлашди. Бироқ натижада эркак фақат Дания тилида гапира бошлади.

 

Маълум бўлишича, бемор бундан 20 йил аввал Данияда яшаган ва сўнг Туркияга қайтиб, Коняда ҳаётини давом эттирган. Охирги 10 йил ичида эса у данияча умуман сўзлашмаган.

 

“Менинг бошимда фақат дания тили бор, турк тилида эса бир оғиз сўз айта олмаяпман”, — дейди у таржимон орқали.

 

Селчук университети тиббиёт факультети доктори Гўкҳан Ўздемирнинг айтишича, мияга қон оқими бузилганда айрим ҳолларда беморлар она тилларини унутиб, илгари ўрганилган ёки нотаниш тилларда гапира бошлаши мумкин. Мутахассис беморнинг тез орада яна турк тилида сўзлашишни бошлашига умид билдирди.

 

Худди шунга ўхшаш ҳолат 8 апрель куни Нидерландияда ҳам қайд этилган. Футбол жароҳати туфайли жарроҳлик амалиёти ўтказилган 17 ёшли ўсмир беҳушликдан уйғонгач, она тилини — нидерланд тилини унутиб, тўсатдан инглиз тилида, америкалик акцент билан сўзлаша бошлаган. Ҳатто у ўзини Юта штатида яшаётган деб таништирган. Шифокорлар психиатрик текширув ўтказган бўлсада, ҳеч қандай жиддий муаммо аниқламаган.