Японияда чақмоққа қарши махсус дрон яратилди
Чақмоқ ҳар йили 700 миллиондан 1,4 миллиард долларгача зарар етказади.
Япониянинг NTT компанияси чақмоқни ўзига тортиб, энергияни хавфсиз тарзда ерга етказиб берадиган дрон ишлаб чиқди. Улар бу технологияни табиий чақмоқдан келадиган зарарларнинг олдини олиш учун яратишди.
2024 йил декабрь ва 2025 йил январь ойларида ўтказилган синовларда, махсус ҳимоя қафасига эга дрон момақалдироқ вақтида 300 метр баландликка кўтарилиб, чақмоқ уришини қасддан ўзига тортди. Тажриба давомида дрон ва ер орасидаги кучланиш 2000 вольтдан ошгани тасдиқланди. Чақмоқ зарбаси кучли овоз ва ёруғлик тарқатди, қафаснинг бир қисми эриб кетди, лекин дрон барибир учишни давом эттирди.
Бунинг сири – дрон атрофидаги махсус қафасда. У чақмоқдан келадиган катта электр оқимини ички қисмлардан четлаб ўтказади ва зарар етказилишининг олдини олади. Қафас шунингдек магнит майдон ва электромагнит шовқинларни камайтиради. Яхши томони шундаки, бу ҳимоя тизимини мавжуд дронларга ҳам ўрнатиш мумкин.
NTT келажакда бундай дронлар жамоалари шаҳарларда бўрон вақтида учиб, чақмоқ зарбасини муҳим инфратузилмадан буриб юборишини хоҳлайди. Чунки Японияда чақмоқ ҳар йили 700 миллиондан 1,4 миллиард долларгача зарар етказади. NTT бу технология билан шаҳарларни ва инфратузилмани чақмоқдан тўлиқ ҳимоя қилишга умид қилмоқда.
