АҚШ Украина киберхавфсизлик лойиҳаларини молиялаштиришни қисқартирди
USAID маблағлари қисқаргач, Украина киберҳимояси заифлашмоқда.
АҚШ Украинага киберхавфсизлик соҳасида кўрсатиб келаётган ёрдамни сезиларли даражада қисқартирди. Маълумотларга кўра, киберхавфсизлик соҳасида фаолият юритаётган ўнлаб украиналик ва америкалик мутахассислар билан тузилган шартномалар бекор қилинган ёки тўхтатиб қўйилган.
Бу ўзгаришлар, асосан, Украина киберҳужумлардан ҳимоя қилиш лойиҳаларини молиялаштириб келган АҚШ Халқаро тараққиёт агентлиги (USAID) фаолиятига ажратилган маблағларнинг қисқартирилиши билан боғлиқ.
Манбаларга кўра, шунингдек, Украина инфратузилмасини ҳимоя қилиш учун мўлжалланган компьютер ускуналари ва дастурий таъминотларнинг режалаштирилган етказиб берилиши ҳам амалга оширилмаган.
Вашингтон маблағлари Киев учун киберхавфсизлик соҳасидаги асосий молиявий манба ҳисобланган. Охирги беш йил давомида USAID бу йўналишга 200 миллион доллардан ортиқ маблағ ажратган.
Эслатиб ўтамиз, февраль ойида Доналд Трамп маъмурияти USAID шартномаларининг 90 фоизини бекор қилиш ниятида эканлигини эълон қилган эди. Натижада, Қўшма Штатларнинг глобал миқёсдаги ёрдам кўламини 60 миллиард долларга қисқартириш режалаштирилган. Март ойида эса Давлат котиби Марко Рубио USAID дастурларининг 83 фоизи ёпилишини расман маълум қилган.
