Россиянинг махфий сунъий йўлдоши назоратдан чиқди
“Kosmos-2553” сунъий йўлдоши ишдан чиққанлиги аниқланди.
Россиянинг ядровий қуролланиш дастурига алоқадор махфий “Kosmos-2553” сунъий йўлдоши назоратдан чиқиб кетди.
Қайд этилишича, сунъий йўлдош катта эҳтимол билан ишдан чиққан. “Kosmos-2553” Россиянинг ядровий компонентга эга янги турдаги коинот қуролини яратиш лойиҳаси билан боғлиқ бўлган.
Маълумотларга кўра, Россия ушбу сунъий йўлдошни 2022 йил февраль ойида, Украина уруши бошланишидан озгина аввал орбитага чиқарган эди.
АҚШ расмийлари “Kosmos-2553”ни Россиянинг коинотда АҚШ сунъий йўлдошларини йўқ қила оладиган ядровий қурол жойлаштириш режаларининг бир қисми деб ҳисобламоқда. Кремль эса бу айбловларни қатъиян рад этмоқда.
Сунъий йўлдошнинг ноодатий ҳаракатлари 2024 йил ноябрь ойида LeoLabs компаниясининг радар тизими томонидан қайд этилган. 2024 йил декабрь ойида ўтказилган қўшимча кузатувлар “Kosmos-2553”нинг назоратдан чиққанини юқори даражадаги ишонч билан тасдиқлаш имконини берди.
"Бу кузатувлар сунъий йўлдош фаолиятининг бутунлай тўхтаганини кўрсатмоқда," — дея таъкидлаган Вашингтондаги Стратежик ва Халқаро Тадқиқотлар Маркази LeoLabs маълумотларини шарҳлар экан.
