Дунё бўйича ҳарбий харажатлар тарихий рекорд ўрнатди
Европа ва Яқин Шарқ ҳарбий бюджетда етакчилик қилмоқда.
2024 йилда дунё бўйича ҳарбий харажатлар 2,7 триллион долларга етиб, ўтган йилга нисбатан 9,4 фоизга ошди. Бу совуқ уруш даври тугаганидан буён кузатилган энг кескин ўсиш ҳисобланади, дея маълум қилмоқда Стокголм Тинчлик муаммоларини ўрганиш институти (SIPRI) ўз ҳисоботида.
Мутахассисларнинг қайд этишича, глобал миқёсда мудофаа харажатлари кетма-кет ўн йилдан буён ортиб бормоқда. Энг катта ўсиш айниқса Европа ва Яқин Шарқ минтақаларида кузатилди, бу эса Украина уруши ва Ғазо секторидаги можаролар билан бевосита боғлиқ.
Хусусан, Германиянинг ҳарбий харажатлари ўтган йили сезиларли даражада ошиб, 88,5 миллиард долларга етди. Бу кўрсаткич 2023 йилга нисбатан 28 фоизга кўпроқдир. Натижада, Германия ҳарбий бюджети ҳажми бўйича дунёда АҚШ, Хитой ва Россиядан кейин тўртинчи ўринни эгаллади.
Украина ҳам рекорд даражада мудофаа харажатларини амалга ошириб, ялпи ички маҳсулотининг 34 фоизини мудофаа эҳтиёжларига йўналтирди. Россия эса ҳарбий харажатларини 149 миллиард долларга етказди, бу ўтган йилга нисбатан 38 фоизга кўпроқ бўлиб, мамлакат ЙИМининг 7,1 фоизига тенгдир.
Аналитиклар бундай тезкор ўсиш халқаро хавфсизликка ва геосиёсий вазиятга жиддий таъсир кўрсатишини таъкидламоқда.
