Шимолий Корея ва Россия ўртасидаги ҳарбий ҳамкорлик кучаймоқда
КХДР Россиядаги ҳарбий операцияларда иштирокини тасдиқлади.
Шимолий Корея (КХДР) ўз ҳарбийлари Россиянинг Украина билан уруши давомида жанговар ҳаракатларда иштирок этаётганини расман тасдиқлади.
Бу ҳақда Ёнҳап агентлиги КХДРнинг расмий ахборот манбаси — Корея Марказий телеграф агентлигига таяниб хабар бермоқда.
Қайд этилишича, Шимолий Корея аскарлари КХДР етакчиси Ким Чен Ин буйруғи асосида ва икки давлат ўртасида тузилган ҳар томонлама стратегик ҳамкорлик шартномасига биноан Россияга юборилган. Расмий маълумотда таъкидланишича, уларнинг вазифаси “Украинанинг Россия ҳудудига тажовузкор бостириб киришининг олдини олиш” ва “Курск вилоятини озод этиш бўйича ҳарбий операцияни муваффақиятли якунлаш”дан иборат бўлган.
Шунингдек, 26 апрель куни Россия Бош штаби раҳбари Валерий Герасимов президент Владимир Путинга берган ҳисоботида, Шимолий Корея ҳарбийлари Курск вилоятини озод қилиш операциясида сезиларли ёрдам кўрсатганини таъкидлади. Герасимовнинг бу баёноти КХДР қуролли кучларининг Россияга юборилгани ҳақидаги биринчи расмий тасдиқ бўлди.
Мутахассисларнинг фикрича, бу каби ҳамкорлик халқаро муносабатларда янги геосиёсий кескинликларни юзага келтириши мумкин.
