АҚШда фалаж бемор миясига чип ўрнатилди
Нутқ қобилиятидан маҳрум инсон энди фикр билан матн ёзмоқда.
Илон Маск асос солган Neuralink компанияси илк бор латерал амиотрофик склероз (ЛАС) билан оғриган, нутқ қобилиятини йўқотган беморга мия имплантацияси муваффақиятли тарзда ўрнатилганини эълон қилди. Бу ҳақда Маск ўзининг «Х» (собиқ Twitter) саҳифасида маълум қилди.
Чиқишида у, Аризоналик 30 ёшли Бредфорд Смит ҳозирда ҳаракатлана олмайдиган ва гапира олмайдиган ҳолатда эканини айтиб, энди у Неуралинк чипи орқали ўз фикрларини компьютер орқали матнга айлантира олишини таъкидлади.
Маск: “Бредфорд Смит дунёда Neuralink чипига эга бўлган учинчи инсон. У деярли тўлиқ фалажланган, аммо бу технология ёрдамида у матн териб, уни нутққа айлантира олади. Бу инсоният учун катта қадам,” — деди.
Neuralink бу технологияни келажакда ҳаракат ва нутқ қобилиятини йўқотган минглаб инсонлар ҳаётини яхшилаш учун кенг қўллашни режалаштирмоқда. Мутахассислар бу технологияни мияни компьютер билан бевосита боғловчи “фикр орқали бошқариладиган интерфейс” деб аташмоқда.
