Трамп Канадани АҚШга қўшишни таклиф қилди
Трамп: “Канада АҚШга қўшилиб, 51-штатга айланиши керак”.
АҚШ президенти Доналд Трамп Канада парламенти сайловлари куни ўзининг Truth Social ижтимоий тармоғида эълон қилган баёнотида Канаданинг АҚШга қўшилиши кераклигини таъкидлади.
Трампнинг сўзларига кўра, АҚШ ва Канада ўртасидаги чегара «сунъий» ва уни бекор қилиш орқали икки мамлакат бирлашиб, янада қудратли бўлиши мумкин. У канадаликларга мурожаат қилиб, агар АҚШга қўшилсалар, улар икки баравар кам солиқ тўлаш, дунёдаги энг кучли ҳарбий қудратга эга бўлиш, компаниялар сонини тўрт баравар ошириш ва нолинчи божхона тарифларидан фойдаланган ҳолда иқтисодий юксалиш имкониятига эга бўлишларини таъкидлади.
“Энди сунъий чизилган чегара bo‘lmaydi... Қаранг, бу кенгликлар қандай ажойиб бўлиши мумкин. Чегараларсиз эркин кириш. Фақат ижобий томонлар, ҳеч қандай салбийлик йўқ. Америка энди Канадани ҳар йили юзлаб миллиард доллар билан субсидиялай олмайди. Агар Канада бизнинг штатларимиздан бирига айланмаса, бу ишда ҳеч қандай мантиқ қолмайди,” — деб ёзган Трамп.
