Хитойда ресторан ёниб кетди
Фожиа оқибатида 22 киши ҳалок бўлган.
Хитойнинг Ляонин вилояти, Ляоянг шаҳридаги турар жой ҳудудида жойлашган ресторанда юз берган даҳшатли ёнғин оқибатида камида 22 киши ҳалок бўлди. Бу ҳақда “Sinxua” давлат ахборот агентлиги хабар берди.
Расмий маълумотларга кўра, ёнғин сешанба куни тушдан кейин бошланган, аммо ҳозирча воқеанинг аниқ сабаблари маълум қилинмаган. CCTV телеканалининг билдиришича, биринчи қаватдаги ресторан биноси ёнғинга ўралган ва атрофдаги ўнлаб автомобиллар ҳам ёниб кетган.
Ижтимоий тармоқларда тарқалган видеоларда ёнғиннинг кучли алангаси ва тутун ичида қолган бинолар акс этган.
Хитой раҳбари Си Сзинпин ушбу фожиани “ниҳоятда оғир” деб атаб, маҳаллий расмийларга жабрланувчиларга зудлик билан ёрдам кўрсатишни, ҳодиса сабабларини аниқлашни ҳамда масъулларни жавобгарликка тортишни буюрди.
Бу Хитойда сўнгги ойларда юз берган бир неча йирик ёнғинлардан биридир. Шу йил апрель ойида Хебей вилоятидаги қариялар уйида чиққан ёнғин 20 кишининг ҳаётига зомин бўлган эди.
