Франция Россияни биринчи бор киберҳужумларда очиқ айблади

 

Франция ҳукумати илк бор Россияни ўз давлатига қарши йиллар давомида олиб борилган киберҳужумлар ортида туришда расман айблади. Франция ташқи ишлар вазири Жан-Ноэл Барро берган баёнотга кўра, Россия ҳарбий разведкаси — ГРУ билан боғлиқ APT28 номли машҳур хакерлар гуруҳи 2021 йилдан бери Франция давлат муассасалари ва хусусий секторига қарши юзлаб киберҳужумларни амалга оширган.

 

“APT28 гуруҳи Франциянинг мудофаа, молия ва иқтисодиёт соҳаларига қарши режалаштирилган ҳужумлар уюштирган. Ҳужумлар кўлами кенг бўлиб, Парижда бўлиб ўтадиган Олимпиада ўйинларига тайёргарлик кўраётган ташкилотлар, шунингдек, президентлик сайлов кампаниялари ҳам нишонга олинган”, — деди Барро.

 

APT28 илгари ҳам бир неча бор эътиборга тушган — хусусан, 2015 йилда улар “Исломий давлат” номидан чиқиб, ТВ5 Монде телеканалининг эфирини бузиб, Францияда ваҳима тарқатишга уринган. Шунингдек, улар 2017 йилда Эммануэл Макроннинг сайлов кампаниясига қарши хакерлик операциясини амалга оширган.

 

АҚШ, Буюк Британия, Германия ва Исроил каби давлатларнинг киберхавфсизлик соҳасидаги етакчи мутахассислари APT28 ҳаракатларини ГРУ буйруқлари асосида олиб борилаётганини тасдиқлаган. Бироқ Россия томони бу айбловларни мутлақо рад этмоқда ва мазкур хакерлар билан алоқаси йўқлигини билдирган.

 

Франция расмийларининг бу чиқиши Европа иттифоқи доирасида Россияга нисбатан киберхавфсизлик сиёсатини кучайтириш чақириқлари фонида юз бермоқда.