Грециялик аёл ChatGPT сабаб эри билан ажрашмоқчи

 

Грецияда 12 йил аввал турмуш қурган, икки фарзандни тарбиялаётган эр-хотин ғайриоддий сабабларга кўра ажрашди: аёл ChatGPT орқали ўтказилган “сохта фолбинлик” асосида эрининг хиёнат қилаётганига ишонди.

 

Хабарларга кўра, аёл бир куни ўзининг кофе чашкасини суратга олиб, сунъий интеллектдан уни “таҳлил қилиб беришни” сўраган. ChatGPT аёлга шундай жавоб қайтарган: унинг эри «Э» ҳарфи билан бошланувчи исмга эга бўлган ёш аёлга нисбатан ҳис-туйғулари бор ва улар ўртасида муносабат бошланиш арафасида.

 

Сунъий интеллектнинг бу «башорати» аёлни ларзага солди. У дарҳол эрини уйдан ҳайдаб чиқарди ва ажрашиш учун ариза берди. Аввалига эри бу воқеани шунчаки ҳазил деб ўйлаган. Аммо орадан кўп ўтмай у ажрашиш ҳақида расмий хабарнома олган.

 

Эрининг айтишича, хотини илгари ҳам мунажжимлар ва кўрувчиларга ишонган, бироқ сўнгги йилларда бундай башоратларга ишонмасликка ўрганган эди. ChatGPTнинг кутилмаган жавоби бу ишончни яна уйғотган кўринади.

 

Воқеа Грецияда ижтимоий мунозараларга сабаб бўлди. Ҳатто анъанавий кофе фолбинлари сунъий интеллект “касбларини тортиб олаётгани”дан хавотирда. Баъзилар уларни ҳимоя қилиш учун петиция ташкил этишни ҳам таклиф қилган.