Малта сармоя эвазига паспорт беришни тўхтатиши мумкин
ЕИ суди Малта фуқаролик дастурини ноқонуний деб топди.
Европа Иттифоқи суди Малта томонидан хорижий инвесторлар эвазига фуқаролик бериш – “олтин паспорт” дастурини ЕИ қонунчилигига зид, деб топди. Суд қарорида айтилишича, ҳеч бир аъзо давлат олдиндан белгиланган тўловлар ёки инвестициялар эвазига фуқароликни тақдим эта олмайди, чунки бу Европа фуқаролигини савдо объектига айлантириш дегани.
Маълум қилинишича, агар Малта бу дастурдан воз кечмаса, унга нисбатан молиявий жазо чоралари кўрилади. Малта ҳукумати эса ушбу қарорнинг ҳуқуқий оқибатларини ўрганаётганини билдирди.
2023 йилда Еврокомиссия бу масалада ЕИ судига мурожаат қилган эди. Комиссия фикрича, “олтин паспорт” бериш орқали Малта Европа фуқаролиги тушунчасини заифлаштирмоқда. Чунки Малта фуқаролигини олган шахс автоматик тарзда бутун Европа ҳудудида яшаш, ишлаш ва ҳатто сайловларда овоз бериш ҳуқуқига эга бўлади.
Малта 2013 йилдан буён бу дастур орқали хорижликларга 600 000 евродан бошлаб инвестиция киритиш эвазига фуқаролик берган. 2020 йилга қадар фуқаролик олганлар мамлакатда яшамаслиги ҳам мумкин эди. Ҳозир эса 3 йил яшаш талаби мавжуд, 750 000 евро сармоя киритсангиз, бу муддат 1 йилга туширилади.
Маълумотларга кўра, ушбу дастур орқали паспорт олган айрим шахслар кейинчалик жиноий жавобгарликка тортилган, санкцияга учраган ёки сиёсий жиҳатдан шубҳали шахслар бўлган.
