АҚШ Украинага тижорий ҳарбий ёрдамни бошлади
Трамп Украинага 50 миллион долларлик ҳарбий битимни тасдиқлади.
АҚШ президенти Доналд Трамп Украинага 50 миллион доллар миқдоридаги ҳарбий техника ва мудофаа хизматларини етказиб бериш бўйича битимга рухсат берди. Бу ҳақда АҚШ маъмурияти хабар бермоқда.
Трампнинг 2025 йил январида Оқ уйга қайтганидан кейинги илк ҳарбий экспорт битими Украина учун техника, техник ҳужжатлар ҳамда тўғридан-тўғри тижорат савдолари (DCS) орқали мудофаа хизматларини ўз ичига олади. Бироқ, етказиладиган маҳсулотларнинг аниқ тафсилотлари ҳозирча ошкор этилмади.
Маълумот учун, АҚШ яқинда Украина билан ҳарбий ҳамкорлик сиёсатини ўзгартирган: эндиликда Киевга қурол-яроғ бепул эмас, тижорий асосда етказиб берилади. Украина президенти Владимир Зеленский бунга жавобан Америка ҳарбий маҳсулотларини тўғридан-тўғри сотиб олишга тайёр эканини билдирган ва бу мақсадлар учун 50 миллион долларгача маблағ ажратишга тайёрлигини маълум қилган эди.
