АҚШда USAID фаолияти тўхтатилмоқда

 

АҚШ Халқаро Тараққиёт Агентлигининг (USAID) барча ходимлари 30 сентябргача ишдан бўшатилади.

Маълумотларга кўра, барча хорижий USAID миссиялари 2025-молия йилида ёпилади (АҚШда молия йили 30 сентябрда якунланади).

Давлат котиби Марко Рубио агентликни қайта ташкил этишни эълон қилган. Ушбу жараён давомида USAID'нинг айрим функциялари 1 июлгача Давлат департаментига ўтказилади, қолган функциялар эса АҚШ маъмуриятининг устувор вазифаларига мос келмагани сабабли тўхтатилади.

Февраль ойида АҚШ президенти Доналд Трамп халқаро ташкилотларни молиялаштириш учун катта маблағ ажратган USAID фаолиятини тўхтатган. Кейинчалик маъмурият агентлик ва Давлат департаментининг хорижий ёрдам кўрсатиш бўйича шартномаларининг 92 фоизини бекор қилиш ниятида эканини билдирган. Бу эса давлат буджетидан тахминан 60 миллиард доллар тежаш имконини беради.

10 март куни Марко Рубио, USAID'нинг вақтинчалик раҳбари сифатида, олти ҳафталик текширувдан сўнг агентлик дастурларининг 83 фоизи расмий бекор қилинганини эълон қилган. Унинг сўзларига кўра, бекор қилинган 5200 та шартноманинг бир қисми Қўшма Штатлар манфаатига эмас, балки айрим ҳолларда унга зарар етказган.