Tesla кенгаши янги раҳбар излаётгани ҳақидаги даъволар асоссиз
Муск: “Tesla раҳбари ўзгаради деган гаплар мутлақо ёлғон”.
Tesla компанияси раҳбари Элон Муск The Wall Street Journal газетасининг компания янги бош директор қидираётгани ҳақидаги хабарини қатъиян рад этди. Бу ҳақда у ижтимоий тармоқдаги саҳифасида баёнот берди.
"WSJ томонидан чоп этилган бу ёлғон мақола ахлоқий мезонларга мутлақо зид. Унда Tesla директорлар кенгашининг бундай даъволарни инкор этгани ҳақида ҳеч қандай изоҳ келтирилмаган", — деб ёзди Муск.
Газета ўз хабарида, компания акцияларининг тушиб кетгани ва баъзи инвесторларнинг норозилигини инобатга олган ҳолда, кенгаш янги раҳбар излашни бошлагани ҳақида маълумот берган эди. Унга кўра, Мускнинг АҚШ ҳукумати самарадорлик департаменти (DOGE) куратори сифатидаги фаолияти Tesla билан боғлиқ мажбуриятларидан чалғитаётган бўлиши мумкин.
Аммо Муск бу даъволарни асоссиз деб ҳисоблаб, барча тахминларни рад этди.
