Трампнинг бож сиёсати АҚШ YaIM'ининг пасайишига сабаб бўлди
Трамп даврида АҚШ иқтисодиёти 2022 йилдан бери илк бор қисқарди.
АҚШ иқтисодиёти 2025 йилнинг биринчи чорагида 0,3 фоизга қисқарди. Бу ҳақда АҚШ Савдо вазирлиги ҳузуридаги Иқтисодий таҳлил бюроси (BEA) маълум қилди. Пасайишнинг асосий сабаблари сифатида давлат харажатларининг камайиши ва импортнинг ошиши кўрсатилган.
Bloomberg нашри ушбу ҳолатни Доналд Трамп маъмуриятининг бож сиёсати билан боғлади. Нашр маълумотига кўра, компаниялар бож ставкалари кучга киришидан олдин кўп миқдорда маҳсулот импорт қилган, бу эса статистик кўрсаткичларга таъсир кўрсатган.
Мутахассислар фикрича, бу Трампнинг савдо сиёсатига жавобан юзага келган "занжирли реакция"нинг илк босқичидир. Иқтисодчилар қисқа муддатда иқтисодий тикланишни кутишмоқда, аммо йил давомида юқори божлар ички талабни пасайтириши ва ишлаб чиқарувчилар учун муаммолар туғдириши мумкин.
Маълумотларга кўра, божхона чораларига жавобан жорий этилган чекловлар экспортни ҳам секинлаштиради. Бу эса 2025 йилнинг қолган уч чорагида иқтисодий ўсишга салбий таъсир кўрсатиши кутилмоқда.
High Frequency Economics бош иқтисодчиси Карл Вайнбергнинг таъкидлашича, "божлар ортгани, солиқ босими кучайгани ва иқтисодий ноаниқликлар йил охирига келиб ялпи ички маҳсулотни манфий ҳудудга олиб кириши мумкин".
