Европа Иттифоқи мудофаа соҳасига сармояни оширмоқда
Украина илк бор Европа мудофаа лойиҳаларида қатнашмоқда.
Европа Иттифоқи 910 миллион евро миқдоридаги янги маблағни мудофаа тадқиқотлари ва инновацион ишланмаларга ажратди. Ушбу маблағлар Европа Мудофаа Жамғармаси доирасида 62 та илғор лойиҳа учун йўналтирилмоқда. Лойиҳа иштирокчилари орасида илк бор Украина ҳам қатнашмоқда.
Еврокомиссия берган маълумотга кўра, Украинадаги Small UAS компаниясининг сунъий интеллект орқали бошқариладиган замонавий аэродинамик тизимлар ишлаб чиқишга оид лойиҳаси танлаб олинган. Бу Украина учун муҳим технологик қадам бўлиб, мамлакатнинг Европа мудофаа тизимидаги ролини мустаҳкамлаши кутилмоқда.
Бошқа ташаббуслар орасида 78 миллион еврога баҳоланган гипертовушли учувчисиз қурилмаларга қарши махфий лойиҳа, 2030 йилгача ишлаб чиқилиши режалаштирилган янги авлод Европа вертолёти, оммавий қирғин қуролларидан ҳимоя тизимлари, минани йўқ қилишга мўлжалланган ягона, автоматлаштирилган Европа тизими, янги авлод материалларини ишлаб чиқиш ташаббуслари мавжуд.
Шу билан, 2021 йилдан буён Европа Иттифоқи мудофаа соҳасидаги тадқиқот ва ишланмаларга ажратган умумий маблағ 4 миллиард евродан ошди.
