Путин урушда стратегиясини ўзгартирдими?
Путин босиб олинган ҳудудлар устидан назоратни сақлаб қолишга уринмоқда.
Хабарларга кўра, АҚШ ва Европа разведка хизматлари ўрганаётган янги маълумотлар Россия президенти Владимир Путин урушдаги эътиборини босиб олинган ҳудудларда таъсирини мустаҳкамлашга қаратаётганини кўрсатмоқда.
Манбаларнинг айтишича, Путиннинг яна бир қисқа муддатли мақсади – оғир аҳволдаги Россия иқтисодиётини ички рағбатлантириш орқали қўллаб-қувватлаш бўлиши мумкин.
Олдинроқ Путин урушда Россия фойда кўришига ишонган бўлса, ҳозирги разведка баҳоларига кўра, у вазиятни бошқача кўра бошлаган.
Маълумотларга кўра, айнан шу разведка маълумотлари Доналд Трамп ва унинг жамоасига Путин тинчлик музокараларига тайёр бўлиши мумкинлигини уқтиришга хизмат қилган.
Шу билан бирга, АҚШ расмийлари бу даъволарга ҳануз шубҳа билан қарамоқда. Уларнинг фикрича, ҳаттоки Россия вақтинча ўт очишни тўхтатишга рози бўлса ҳам, кейинчалик урушни яна давом эттириш хавфи мавжуд.
“Менимча, Путин айни дамда ўзига фойдали деб ҳисоблаган ва эришилиши мумкин бўлган мақсадларга ҳаракат қилмоқда”, — дейди Ғарб разведкасининг юқори лавозимли вакили.
