Ким Чен Ин танкларини янгиламоқчи
У қуруқликдаги қўшинларни янги танклар билан таъминламоқчи.
Шимолий Корея етакчиси Ким Чен Ин қисқа вақт ичида Корея халқ армиясининг зирҳли техника паркини янгилаш зарурлигини таъкидлади. Корея Марказий телеграф агентлигининг хабарига кўра, у ҳарбий техникалар билан танишиш жараёнида танксозликдаги ютуқларни эътироф этиб, ишлаб чиқаришда иккинчи тўнтаришга чақирди.
Ким Чен Ин сўзларига кўра, қуруқликдаги қўшинларни энг янги танклар ва зирҳли машиналар билан таъминлаш ҳарбий модернизациянинг асосий вазифаларидан бири бўлиб қолмоқда. У жанговар ҳаракатларнинг ҳозирги шароитлари ва техниканинг урушдаги ўрнига ҳам алоҳида урғу берди.
Эслатиб ўтамиз, яқинда Шимолий Корея тарихидаги энг йирик ҳарбий кема қурилаётгани ҳақида ҳам хабарлар чиққан эди. Сунъий йўлдош суратларига кўра, бу кема Пхеняндан жануби-ғарбда жойлашган Нампо кемасозлик заводида барпо этилмоқда.
