Трамп Хитойга нисбатан бож тўловларини камайтиришини билдирди

 

АҚШ президенти Доналд Трамп яқин келажакда Хитойга қўйилган импорт тарифларини камайтириши мумкинлигини айтди. Унинг таъкидлашича, агар божлар пасайтирилмаса, АҚШ ва Хитой ўртасида самарали бизнес юритиш имкони бўлмайди.

 

Бу ҳақда Трамп НБС Невс телеканалига берган интервьюсида маълум қилди.

 

“Бир нуқтада мен тарифларни тушираман. Чунки акс ҳолда биз улар билан бизнес қила олмаймиз,” — деди Трамп. У бундай қарор қачон қабул қилиниши мумкинлиги ҳақида аниқ вақтни билдирмаган.

 

Трампнинг сўзларига кўра, Хитой АҚШ билан савдо алоқаларини давом эттиришга жуда қизиқмоқда, чунки Хитой иқтисодиёти ҳозирда "жуда ёмон аҳволда".

 

Маълумот ўрнида, 2 апрель куни Трамп дунёнинг 185 давлатидан импорт қилинадиган маҳсулотларга 10 фоизлик универсал бож жорий этилишини эълон қилган эди. Бу тўловлар 5 апрелдан кучга кирган, индивидуал тарифлар эса 9 апрелдан бошлаб амал қила бошлаган.

 

Кейинчалик Трамп айрим мамлакатлар билан олиб борилаётган савдо музокаралари сабабли индивидуал божларни 90 кунга тўхтатиб туришга қарор қилган, аммо 10 фоизлик универсал бож кучда қолмоқда.

 

Шунингдек, Трамп маъмурияти Хитой маҳсулотларига бож ставкаларини 125 фоизгача оширган. Натижада, АҚШнинг Хитойдан импорт қилинадиган маҳсулотларга қўлланаётган умумий бож ставкаси ҳозирда 145 фоизни ташкил қилади. Бунга жавобан Хитой ҳам 12 апрелдан бошлаб АҚШ маҳсулотларига нисбатан божларни 125 фоизга оширган эди.