Бразилия Россия–Украина урушида бетараф воситачи бўлишни таклиф қилди
Лула ҳукумати можаро ечимида фаол роль ўйнашга тайёр.
Бразилия ҳукумати Россия ва Украина ўртасидаги урушни тугатиш бўйича музокараларда воситачилик қилишга тайёрлигини билдирди. Хабарларга кўра, бу таклиф АҚШ воситачиликдан чекиниши эҳтимоли мавжуд бўлган шароитда илгари сурилган.
Бразилия расмийларининг фикрича, уларнинг нейтрал сиёсий позицияси ва икки томон билан барқарор дипломатик алоқалари мавжуд муросасизликни юмшатишда муҳим роль ўйнаши мумкин. Расмийлар Бразилиянинг бетарафлиги ва халқаро майдонда нисбатан ишончли воситачи сифатидаги обрўсига таянмоқда.
Мамлакат президенти Луиз Инациу Лула да Силва уруш бошланганидан бери кўп маротаба можаронинг тинч йўл билан ҳал қилиниши тарафдори эканлигини билдирган. Бразилия, шунингдек, БМТ доирасида ҳам бир неча бор ҳарбий ҳаракатлар ўрнига музокараларни илгари суриш зарурлигини таъкидлаган.
