Чехияда Иккинчи жаҳон уруши даврига тегишли хазина топилди
Коллекция тахминан 6,8 кг оғирликка эга.
Чехияда, Звичина тепалиги яқинидаги ўрмонда Иккинчи жаҳон уруши даврига оид хазина топилди. Бу хазина 2025 йил февраль ойида икки сайёҳ томонидан топилиб, ҳозирда Шарқий Богемия музейида сақланмоқда. Топилмалар орасида олтин тангалар, билагузуклар, калитли занжирлар ва тамаки халтачалари бор.
Музей ходимларининг айтишича, жами 598 та танга, асосан 1800–1900 йилларга мансуб бўлиб, улар Франция, Австрия-Венгрия, Бельгия ва Усмонли империясида зарб қилинган. Буюмлар эҳтимол уруш пайтида атайин яшириб қўйилган бўлиб, бу коллекция тахминан 15 фунт (6,8 кг) оғирликка эга.
Маълумот учун, 1938 йилда Германиянинг Судетни аннекция қилиши ортидан кўплаб яҳудийлар ва немислар Чехословакиядан қочишга мажбур бўлган. Ҳозир экспертлар топилманинг асл эгаси ва тарихий контекстини аниқлаш устида изланишлар олиб бормоқда.
