Испанияда қуёш нурлари ҳаёти учун хавфли бўлган бола аниқланди
Ноёб касаллик туфайли бола фақат қуёш ботгандан кейингина ташқарига чиқиши мумкин.
Испаниянинг Каталония минтақасида истиқомат қилувчи 12 ёшли бола ноёб ва оғир генетик касаллик – ксеродерма пигментози ташхиси билан яшамоқда. Бу касаллик боланинг терисини қуёш нурларига ниҳоятда сезгир қилиб қўйган. Шифокорлар боланинг соғлиғини ҳимоя қилиш мақсадида унга фақат қуёш ботгандан кейин ташқарига чиқишга рухсат берган.
Мазкур касаллик ультрабинафша нурларга чидамсизлик билан кечади ва тери саратони ривожланиш хавфини кескин оширади. Афсуски, ҳозирда бу касалликнинг давоси мавжуд эмас. Шу сабабли, бола кун давомида тўлиқ ёпиқ ҳолда – узун енгли кийимлар, қўлқоп, кенг шапка, махсус қуёшдан ҳимоя креми, кўзойнак ва ҳатто ультрабинафша нурланишни ўлчайдиган махсус асбоб билан ҳаракатланишга мажбур.
Фақат мактабга бориш унинг кундузги ташқарига чиқишига истисно сифатида рухсат этилган, аммо бу ҳам фақат тўлиқ ҳимоя чоралари кўрилган тақдирдагина. Боланинг онаси журналистларга берган интервьюсида фарзандининг ижтимоий ҳаёти чекланганини, дўстлар билан учрашув ва оддий болалик қувончларидан маҳрум бўлганини таъкидлаган.
