Исроил Яманга ҳаво ҳужуми уюштирди
Исроил ҳарбийлари ҳусийларни Эрон қуролларини ташишда айбламоқда.
5 май куни кечқурун Исроил ҳарбий-ҳаво кучлари Ямандаги ҳусийларга қарши йирик ҳаво ҳужуми амалга оширди. Тахминан 20 та қирувчи самолёт Ходейда порт шаҳри ва Бажил шаҳри яқинидаги цемент заводини нишонга олди.
Ҳужум ҳусийлар томонидан Тел-Авивдаги Бен Гурион аэропорти яқинига қилинган ракета ҳужумига жавобан уюштирилган. Ўшанда бир нечта одам жароҳат олганди.
Исроил ҳарбийлари ҳусийларни Эрон қуролларини ташишда ва цемент заводидан ҳарбий иншоотлар қуришда айбламоқда. Уларнинг айтишича, бу ҳужум ҳусийларнинг иқтисодиёти ва ҳарбий салоҳиятига жиддий зарба бўлди.
Бу Исроилнинг Ямандаги ҳусийларга қарши уруши бошланганидан бери олтинчи, 2025 йилда эса биринчи ҳаво ҳужуми бўлди. Маълумотларга кўра, зарбалар АҚШ билан мувофиқлаштирилган, лекин қўшма операция бўлмаган.
Шунингдек, Яман ОАВлари АҚШ ҳам пойтахт Сана шаҳрига ҳаво ҳужуми уюштиргани ва бу ҳужумда 16 киши жароҳатлангани ҳақида хабар берди.
