Европа Россия газидан воз кечмоқчи

 

Европа Иттифоқи 2027 йил охирига қадар Россиядан газ импортини бутунлай тўхтатишни режалаштирмоқда.

 

Маълумотларга кўра, 6 май куни Еврокомиссия аъзоларига Россия билан янги газ шартномаларини тузишни тақиқлаш ҳамда мавжуд келишувларга ҳам босқичма-босқич чек қўйишни таклиф қилади. Ҳозирда бу шартномалар Иттифоқга импорт қилинаётган газнинг тахминан учдан бир қисмини ташкил этади.

 

Режа амалга ошса, бу Россиядан газ харид қилишга якун ясайди ва Евроиттифоқнинг ушбу давлатга энергетик қарамлигини бутунлай тугатади. Маълум қилинишича, бу ҳаракатлар АҚШ, Қатар, Канада ва Африка давлатларидан суюлтирилган газ оқимининг кўпайиши ҳисобига бозор барқарорлигини сақлаб қолишга қаратилган.

 

Агентлик маълумотига кўра, 2024 йилда Европа Иттифоқи Россиядан 23 миллиард евро миқдоридаги энергия ресурсларини харид қилган. Бу кўрсаткич айни даврда Украинага кўрсатилган ҳарбий ёрдам миқдоридан ҳам ортиқ.