Трамп Канадани АҚШга қўшишни таклиф қилди
“Канада сотилмайди!” – Марк Карни Трампга жавоб қайтарди.
АҚШ президенти Доналд Трамп Канаданинг бош вазири Марк Карнига унинг мамлакатини Қўшма Штатлар таркибига қўшишни таклиф қилди. Трампнинг фикрича, бу Канада фуқаролари учун катта иқтисодий ва хавфсизлик афзалликларини беради.
"Бу таклиф Канадаликлар учун солиқ юкини камайтиради. Улар дунёдаги энг кучли армия, илғор тиббий хизмат ва бошқа кўплаб имкониятларга эга бўлади", – деди Трамп Оқ уйда бўлиб ўтган учрашувда.
Бироқ бош вазир Марк Карни бундай таклифга: “Канада сотилмайди!” – дея қатъий жавоб қайтарди.
Карни шундай давом этди: “Агар сиз кўчмас мулк бозоридан хабардор бўлсангиз, биласизки, айрим ҳудудлар ҳеч қачон сотилмайди. Мен сайлов кампанияси доирасида кўплаб Канада фуқаролари билан учрашдим. Уларнинг хоҳиши равшан: биз мустақиллигимизни сақлаймиз. Аммо АҚШ билан ҳамкорлик учун кенг имкониятлар бор”.
У, шунингдек, Канаданинг АҚШнинг мудофаа харажатларини ошириш таклифини қўллаб-қувватлашини таъкидлади. Трамп эса Канаданинг бу йўлда аллақачон чоралар кўраётганини билдирди.
