Украина дронлари Москва ва бошқа вилоятларга ҳужум қилди
Россияда боғча ва мактаблар вақтинча ёпилган.
Россия Мудофаа вазирлигининг маълум қилишича, 7 майга ўтар кечаси Украина томонидан учирилган дронлар Мордовия, Тула ва Ярославл вилоятлари, шунингдек, Москвага йўналтирилган.
Москва мери Сергей Собяниннинг сўзларига кўра, соат тунги 00:00 дан бошлаб ҳаво ҳужумидан мудофаа кучлари 9 та дронни йўқ қилган. Ҳозирча жабрланганлар ҳақида маълумот берилмаган. Айрим манбаларга кўра, ҳужумлар Кубинка ҳарбий аэродроми — қирувчи самолётлар жойлашган ҳудудни нишонга олган.
Тула вилояти губернатори Дмитрий Миляев эса вилоятга 5 та дрон ҳужуми уюштирилганини билдирди. Украина манбаларига кўра, ҳужумлар «Сплав» илмий-ишлаб чиқариш бирлашмаси — «Град», «Смерч» ва «Ураган» ракета тизимлари ишлаб чиқариладиган корхонага йўналтирилган.
Мордовияда ҳам дрон ҳужуми қайд этилган. Саранск шаҳри расмийлари 7 май куни мактаб, боғчалар, коллеж ва ОТМларда дарслар бекор қилинганини маълум қилди. Ҳудуд раҳбари Артём Здунов аҳолига эҳтиёткорлик чораларини кўришни тавсия қилган. Тезкор штаб эса дрон ҳужумларининг оқибатларини суратга олиш ва тарқатишни тақиқлаган.
Маълумотларга кўра, ҳужумлар «Саранскабел» ва «Саранскабел-Оптика» заводларига йўналтирилган.
