Россия урушни тўхтатса, ЖЧ-2026да қатнашиши мумкин
Инфантино ва Трамп Россиянинг халқаро футболга қайтиши ҳақида фикр алмашди.
АҚШ президенти Доналд Трамп Россияни 2026 йилда бўлиб ўтадиган футбол бўйича Жаҳон чемпионатида иштирок этишга рухсат бериш ғоясини илгари сурди. Унинг фикрича, бу таклиф Москва учун Украина урушини тўхтатишга туртки бўлиши мумкин.
Хабарларга кўра, Трамп бу фикрини ФИФА президенти Жанни Инфантино билан учрашуви чоғида билдирган. Учрашув давомида у Россиянинг 2022 йилдан бери халқаро футбол мусобақаларидан четлаштирилганини илк бор эшитгани айтилмоқда.
ФИФА раҳбари Инфантино ҳам вазиятга умид билан қараётганини билдирди.
“Ҳа, ҳозирда Россия футболчилари иштирок эта олмайди, аммо умид қиламизки, яқин келажакда тинчлик қарор топади ва улар яна халқаро майдонларга қайтади,” — дея таъкидлади.
Трамп эса ушбу ҳолатни дипломатик имконият сифатида кўриб, қуйидагича фикр билдирди: “Бу амалга ошиши мумкин. Бу Россия учун ижобий рағбат бўлиши мумкин, тўғрими? Биз уларнинг тўхташини истаймиз”.
Россиянинг спорт мусобақаларидан четлатилиши 2022 йилда Украинага бостириб кириши билан боғлиқ халқаро санкциялар доирасида амалга оширилган эди. 2026 йилда эса футбол бўйича Жаҳон чемпионати АҚШ, Канада ва Мексика мезбонлигида ўтказилиши белгиланган.
Бу каби таклифлар сиёсат ва спорт ўртасидаги мураккаб муносабатлар, шунингдек, халқаро босим воситаларининг турли шаклларини муҳокама қилиш учун янги мавзулар очмоқда. Бироқ кўплаб мутахассислар бундай ёндашув спортга сиёсий манипуляция сифатида қаралиши мумкинлигини таъкидлашмоқда.
