Россияда 10 майгача мобил алоқа чекланади
Бунга Ғалаба куни арафасида хавфсизликни таъминлаш масалалари сабаб бўлган.
Украина дронларининг навбатдаги тунги ҳужумидан сўнг Россиянинг 30 дан ортиқ шаҳрида яшовчилар мобил алоқа ва интернет хизматларида жиддий узилишлар ҳақида шикоят қилмоқда. Хизмат кўрсатувчи компаниялар — банклар, мобил операторлар, етказиб бериш тармоқлари ҳамда такси иловалари — мижозларни фаолиятдаги вақтинча узилишлар ҳақида огоҳлантирди.
Кремль матбуот котиби Дмитрий Песковнинг сўзларига кўра, бу чекловлар тасодифий эмас. У баёнотида айтишича, 9 май — Россияда кенг нишонланадиган Ғалаба куни арафасида хавфсизликни таъминлаш мақсадида мобил интернет ва алоқага махсус чекловлар жорий этилмоқда.
“Бу хавф даражасига қараб амалга оширилаётган вақтинчалик чоралар бўлиб, 10 майгача амал қилади”, — деди Песков.
Расмийлар бу чекловлар асосан стратегик тадбирлар, оммавий йиғинлар ва ҳарбий парадлар вақтида хавфсизликни оширишга қаратилганини билдиришмоқда. Бироқ кузатувчилар назарида, бу ҳолат Украинадан келаётган хавфлар фонида ахборот оқимини назорат остида ушлаб туриш истагини ҳам акс эттиради.
