Трамп Британия билан савдо битимини тузишга қарор қилди

 

АҚШ президенти Доналд Трамп бугун Буюк Британия билан савдо битими тузилиши ҳақида эълон қилиши кутилмоқда. Бу ҳақда The New York Times газетаси ўз манбаларига таяниб хабар берди.

 

Бу битим АҚШ божхона тарифларини жорий қилганидан кейинги илк савдо шартномаси бўлиши мумкин. Ҳозирча АҚШ ва Буюк Британия ўртасидаги келишув тафсилотлари ошкор этилмаган. NYT манбаларининг айтишича, дастлаб томонлар рамкавий келишувни тақдим этади, сўнгра ҳужжатнинг якуний шартлари устида иш давом эттирилади.

 

Шунингдек, хабарда айтилишича, Қўшма Штатлар Исроил ва Ҳиндистон билан ҳам савдо келишуви бўйича музокараларда ниҳоясига етмоқда. Ветнам, Жанубий Корея ва Япония билан эса музокаралар давом этмоқда.

 

Трамп аввалроқ пайшанба куни йирик матбуот анжумани ўтказилишини билдирган эди. Унинг таъкидлашича, бу анжуман "катта ва нуфузли мамлакат вакиллари билан тузилган муҳим савдо битими"га бағишланади. Бироқ президент битим айнан қайси давлат билан имзолангани бўйича аниқлик киритмаган.